Deu 11 | ZomZIV | STEP | TOPA note Pasian it unla, ama hong ngetna, a thukipte, a thukhamte, le a thupiakte zui tawntung un.

Deuteronomy 11

TOPA Itin A Thu Mang Un

1 TOPA note Pasian it unla, ama hong ngetna, a thukipte, a thukhamte, le a thupiakte zui tawntung un. 2 TOPA note Pasian hong sektatnate a mu lo le a sinkha lo na tate uh hopih ka hih loh lam tuni-in thei un. Tuate in amaute in ama thupina a khut hatna a zankhiat a ban; 3 Egypt gam sunga Egypt kumpipa Pharaoh le gambup tunga a bawl na lamdangte; 4 Egypt galkapte tung, a sakolte uh le a sakollengte uh tunga a septe, note hong nungdelh laitakun amaute San Tuipi ^{▼▼11.4 Hebrew in Yam Suph; tua in Pumpeng Tuipi cihna} tui in a tupmangna le TOPA in amaute a siatmangsaknate ahi hi. 5 Hih mun na tun mateng uh sehnel gamah no adingin a septe na tate un mukha lo uh a, 6 tuateh Reuben-te, Eliab’ tapate Abiram le Dathan tunga a hih, Israel khempeuh laizang lian ah leitung kamka-a, amau innkuan bup le a puanbukte uh tawh amau neihsa a ganhing khempeuh uh a nawmvalhna, a mu na tate uh hi lo hi. 7 Ahi hangin TOPA bawlsa na lianpi khempeuh mita mu note na hi uh hi. ^b

8 Tua ahi ciangin note Jordan kantanin pai-a, tua gam na lak zawh nading uh, hatna na neih theih nading un tuni-a kong thupiakte khempeuh zui un, 9 tua pen na pute uh tung le amau suante tungah piak dingin TOPA kiciamnasa gam - bawngnawi le khuaizu a luanna ah sawtveipi na nuntak theih nadinguh ahi hi. 10 Note luta na luah ding uh gam pen, anteh huan ah ankungno suanin, khe in tui na buah na uh note hong pai khiatna Egypt gam bang hi lo hi. 11 Ahi hangin note in Jordan kantan-a na lak ding uh gam in mual le guam om-a, van panin guahtui a ngak leitang ahi hi. 12 TOPA note Pasian in tua gam kema; TOPA note Pasian mit in kum kipat a kipan kum bei dong a tawntungin a mitsuanna leitang ahi hi.

13 Tua ahi ciangin note in muanhuaitakin tuni-a kong thupiakte na man uh a - TOPA note Pasian it-in, na lungsim khempeuh uh le na hinna khempeuh uh tawh ama na nasep uh leh 14 tua ciangin note in an la-in zuthak le sathau na kaihkhop theih nadingun na gamuah sikhiau guah le tukguah ka zusak tuak ding hi. 15 Na ganhonte uh adingin lopaang ah lopa kong pia dinga, note in ne-in na tai ding uh hi. ^c

16 Pasian dangte bia-a kun dingin note hong kizolkhiat khak ding kidawm un. 17 Tua hileh TOPA hehna no tungah kuangin guah haang in lei in bangmah a gahsuah loh nadingin amah in vante khakcip dinga, TOPA in note hong piaksa gam hoih panin na mangthang pah ding uh hi. 18 Hih ka thugente na lungsim uh le na ngaihsutna-uah kiplet unla; na khutuah lim bangin henin na tal-uah suang un. 19 Na tate uh hilh un; inn ah na om uh ciang, lam na pai uh ciang, na lup uh ciang, na thawh uh ciangin na tate uh genpih un. 20 Na inn kongkhak mung tung uh le na kongpite uh tungah tuate gelh un. 21 Tua in leitung tungsan ah vante a om laisiah TOPA in na pute uh piak dinga a khapsa gam ah no le na tate uh na pun theih nading uh ahi hi. ^d

22 Keimah in note zuih dinga kong piak hih thupiakte khempeuh limtakin zui a - TOPA note Pasian it in, ama lampi khempeuh tawna, amah na letkip uh leh - 23 tua ciangin TOPA in na mai panun hih minamte khempeuh nawhkhia dinga, no sangin tamzaw-a, a hatzaw minamte na suankhia zo ding uh hi. 24 Na khe un na sikna peuhpeuh uh: sehnel- gam panin Lebanon ciang le Eupharates Gun panin nitumna tuipi ^{▼▼11.24 Tua in Mediterranean} ciang dong no aa hi ding hi. 25 No langah kuamah a pang zo kei ding hi. TOPA note Pasian in note tungah hong ciamsa bangin, gambup a note paina peuhpeuh ah note kihtakna le lauthawngna a omsak ding hi. ^f

26 En un, tuni-in note mai-ah thupha le hamsia ka koihkhawm hi - 27 tuni-a kong piak TOPA note Pasian thupiakte na man uh leh thupha hi in; 28 tuni-a kong thupiak TOPA note Pasian thupiakte mang loin na kiheisan uh a, na theih loh uh pasian dangte na zuih uh leh hamsia na lawhtak ding uh hi. 29 Note lut-a na lak ding uh gamah TOPA note Pasian in note hong puak khit ciangin Gerizim Vum tungah thuphate na tangko ding uh a, Ebal Vum tungah hamsiate na tangko ding uh hi. 30 Na theihsa bangun hih mualte Jordan galkhat lampi ^{▼▼11.30 Ahikeh Jordan nitumna lam} nitumna-lam, ni a tumna a Moreh singkung lianpite kiang, Gilgal gei mahmah a Arabah a teng Canaan-te gam sunga om ahi hi. 31 Note in TOPA note Pasian in hong piak ding gam ah lutin na luah nadingun Jordan kantan ding na hi ta uh hi. Note in tua gam la khinin na ten uh ciangin, 32 tuni-a note mai-a kong lui thukip le thukham khempeuh na mang taktak ding uh hi.